ارزګان کې پر لس زره او ۶۶۰ بزګرانو د غنمو اصلاح شوي تخمونه وېشل کیږي

۵ لیندۍ ۱۳۹۹
د ارزګان دکرنې، اوبولګولو او مالدارۍ ریاست ددې ولایت پر بزګرانو د غنمو د اصلاح شویو تخمونو د وېش لړۍ پیل کړی دی.
په دې لړۍ، کې د ارزګان ولایت په کچه پر لس زره او ۶۶۰ بزګرانو د غنمو اصلاح شوي تخمونه او کیمیاوي سرې وېشل کیږي.
د ارزګان د کرنې، اوبولګولو او مالدارۍ رییس احمدشاه خیري وایي، چې په دې لړۍ کې پر لس زره او ۶۶۰ بزګرانو د غنمو اصلاح شوي تخمونه وېشل کیږي، چې په پایله کې یې ددې ولایت د مرکز په ګډون د ټولو ولسوالیو په زرګونه جریبه ځمکه کې به د غنمو اصلاح شوي تخمونه وکرل شي.
د ارزګان د کرنې رییس احمدشاه خیري وویل، چې له دې ډلې دکرنې وزارت له خوا پر پنځه زره او ۸۶۰ بزګرانو پر هر یوه بزګر د غنمو ۵۰ کیلو اصلاح شوي تخم د سبسایډي په ډول، چې ۶۰ سلنه لګښت یې دکرنې وزارت او ۴۰ سلنه لګښت یې بزګران ورکوي وېشل کیږي. د ښاغلي خیري په خبره ددې ترڅنګ د ارزګان ولایت پر څلور زره او ۸۰۰ بزګرانو د ملګرو ملتونو د خوړو او کرنې ادارې «FAO» په مالي مرسته د غنمو اصلاح شيو تخمونه او کیمیاوي سرې له سبسایډې پرته په وړیا توګه وېشل کیږي.
د یادو مرستو موخه په دې ولایت کې د غنمو د حاصلاتو زیاتوالی او د بزګرانو ملاتړ دی.