هلمند کې ۱۰۰ بېوزله ښځو ته د سبو د پروسس په برخه کې د کار زمینه برابریږي

۲۸ تله ۱۳۹۹
د هلمند د کرنې، اوبولګولو اومالدارۍ ریاست د مېرمنو د اقتصادي ودې او دوی ته په کور دننه دکار زمینې برابرول په پار د دې ولایت د مرکز لښکرګاه او نادعلي ولسوالۍ ۱۰۰ بېوزله ښځو ته د سبو د پروسس په برخه کې د کار د زمینې برابرولو په پار پر یادو مېرمنو د سبو وچولو او پروسس د اړینو توکو او دستګاوو د وېش لړۍ پیل کړئ دی.
د هلمند دکرنې رییس زلمی الکو وایي، چې د یادې پروسې له لارې هغه ښځې، چې اقتصادي حالت یې ښه نه وي، بېوزله او له مالي ستونزو سره مخ وي، دسبو د پروسس دستګاه او اړین توکي ورکول کیږي، ترڅو له همدې لارې د خپلې کورنۍ اړتیاوې پوره او اقتصادي وضعیت یې ښه شي.
کومې مېرمنې چې اوس په دې ولایت کې د سبو د پروسس په برخه کې د فعالیت زمینه ورته برابریږي، تر دې وړاندې په کورونو کې اوزګار ناست ول.
دغه برنامه د کرنې ریاست اړوند د کورني اقتصاد پراختیا پروژې له لوري په لاره اچول شوې، چې تر ډېره بې وسه، ناداره او اړمنې کورنۍ پکي په پام کې نیول شوي دي.
باید وویل شي، چې موده مخکې د هلمند ولایت په مرکز لښکرګاه، نادعلي او ناوې ولسوالۍ کې ۳۵۰  بېوزلو مېرمنو ته د کارزمینه برابره شوې وه.
د هلمند دکرنې، اوبولګولو او مالدارۍ ریاست په دې ولایت کې مېرمنو ته د کارموندنې په موخه د نورو فعالیتونو ترڅنګ د کورنیو بڼګیو او نوي بڼونو د جوړولو په برخه کې هم کار کوي. ددغو پروژو د پلي کولو موخه په دې ولایت کې، د سبو او مېوو د پروسس دودول، د کورنیو باغچو وده او پراختیا او د بېوزلو کورنیو اقتصادي ملاتړ دی.
ددغو مرستو موخه د مېرمنو اقتصادي ملاتړ او د دوی د کورنیو اقتصادي ودې ته زمینه برابرول دي.
د کرنې وزارت په هېواد کې د مېرمنو د وړتیا لوړلو او اقتصادي غوړېدا په موخه پراخ فعالیتونه پیل کړي دي او هلې ځلې کوي چې، بېوزله کلیوالې مېرمنې سره مالي او تخنیکي مرستې وکړي تر څو په راتلونکې کې دغه مېرمنې پر ځان بسیا دوی او کورنۍ یې روښانه راتلونکې ولري.