د لغمان ولایت دولت شاه ولسوالی کې د عشر او زکات عامه پوهاوي ناسته ترسره شوه
د لغمان ولایت کرنې، اوبولګولو او مالدارۍ ریاست اړوند دولت شاه ولسوالی کې د عشر او زکات مسؤلینو د زر کمر سیمې قومي مشرانو او علماؤ کرامو سره د عشر او زکات د ورکړې په اړه د عامه پوهاوي ناسته وکړه.
په دې ناسته کې د عشر او زکات مسؤلینو د اسلامي شریعت په رڼا کې د عشر او زکات د ورکړې اهمیت او ارزښت بیان کړ او له قومي مشرانو او علماؤ څخه یې وغوښتل چې د عشر د راټولولو په پروسه کې له عاملینو سره همکاري وکړي. د سیمې مشرانو او علماؤ هم په دې برخه کې د بشپړې همکارۍ ډاډ ورکړ.
له ناستې وروسته د دولت شاه ولسوالۍ د عشر مدیر ملا محمد هاشم هاشمي سیمې ته لاړ او د جوارو د فصل د عشر د راټولولو له روان بهیر څخه یې څارنه وکړه. نوموړي عاملینو ته سپارښتنه وکړه چې له ولسونو سره د عشر د راټولولو پر مهال نېک چلند وکړي.
