کونړ کې پر ۳۰ جریبه ځمکه کې د مالټې بڼونه جوړېږي
۲۸ کب ۱۴۰۲ه.ش
۸ رَمَضانُ المُبارَک ۱۴۴۵ه.ق
دکونړ دکرنې، اوبولګولو او مالدارۍ ریاست د ملګرو ملتونو پراختیایي ادارې په همکارۍ ددې ولایت په درېیو ولسوالیو «چپې درې، ماڼوګې او وټپور» کې د مالټې ۳۰ جریبه بڼونو جوړولو چارې پیل کړي دي.
د مالټې یاد بڼونه د سرچ مؤسسې په تخنیکي همکارۍ جوړېږي، چې ورسره لسګونو کسانو ته په نېغه او یوشمېر نورو کسانو ته په نا نېغه ډول د کار زمینه برابرېږي.
د چارواکو په خبره د تېرو کلونو په ترڅ کې د کونړ ولایت په سلګونه جریبه ځمکه کې د مالټو نوې بڼونه جوړ شوي دي، چې ورسره په دې ولایت کې د سټرویو د حاصلاتو کچه هم زیاته شوې ده.
د مالټې د دغو بڼونو جوړولو موخه هېواد د سټروسو مېوو له اړخه پر ځان بسیا کول او په ټوله کې د سټروسو بڼونو ترویج او خلکو ته د کار زمینه برابرول دي.
د افغانستان ختیځ ننګرهار، لغمان او کونړ ولایتونه مدیتراني اقلیم او د مالټو، نارنج او لیمو بڼونو لپاره مناسبه هوا لري، چې هر کال له یادو ولایتونو څخه په زرګونه ټنه د سټرسو حاصلات راټولېږي.
