د هلمند بولان څېړنیز فارم کې زده کړیالانو ته د عملي زده کړې زمینه برابره شوې
۱۹ کب ۱۴۰۲ه.ش
۲۸ شَعبان المُعَظّم ۱۴۴۵ه.ق
د هلمند ولایت د کرنې، اوبو لګولو او مالدارۍ ریاست اړوند د بولان څېړنیز فارم کې د کرنې پوهنځۍ زده کړیالانو ته په عملي او نظري ډول د زده کړې زمینه برابره شوې ده.
د هلمند د کرنې ریاست چارواکي وايي، چې ددې ولایت د کرنې پوهنځۍ زده کړیالانو ددې ولایت د بولان څېړنیز فارم څخه وخت ناوخت لیدنه کوي، چې ددغو لیدنو په ترڅ کې د هلمند ولایت د مارجې ولسوالی د کرنې او وټرنرۍ انسټیټوټ زده کړیالانو ته د عملي او نظري زده کړې زمینه برابره شوه.
په پیل کې د یاد فارم مسؤل ښاغلي عبدالرحمن خاکسار لخوا د فارم د بېلابېلو تجاربو، مورنیو او هستیو تخمونو د روزلو او مېوه لرونکو بڼوڼو او همدا راز د فارم د ګڼو برخو د رغولو په اړه ورغلو زده کړیالانو او استادانو ته معلومات ورکړل شو.
دیادولو وړ ده چې د بولان څېړنیز فارم د هېواد په کچه د کرنیزو عملي زدکړو لپاره ښه مرکز ګڼل کېږي، چې هر کال په بېلابېلو فصلونو کې د هلمند پوهنتون د کرهنې پوهنځۍ، او د کرنې او وټرنرۍ انستیتوت محصلینو ته د یاد فارم د متخصصینو لخوا په عملي ډول زدکړيې ورکول کېږي.
