د هلمند مارجې ولسوالی کې د سبو د اصلاح شویو تخمونو د حاصلاتو نندارتون دائر شو
۳۱ غبرګولی ۱۴۰۲ه.ش
۳ ذیالحِجّة ۱۴۴۴ ه.ق
د هلمند ولایت د کرنې، اوبولګولو اومالدارئ ریاست له خوا د ډاکار(DACAAR) مؤسسې په مالي همکارۍ ددې ولایت د مارجې ولسوالی لسګونه بزګرو ته د بېلابېلو سبو پسرلني اصلاح شوي تخمونه د همدې کال په پیل کې وېشل شوي وو چې دا مهال د یادو کښتونو حاصلات رسیدلي دي.
د نوموړو اصلاح شویو تخمونو څخه رسیدلي او ترلاسه شوي حاصلات چې د ښه کیفیت او کمیت لرونکي دي د ترویجولو په موخه او د نورو بزګرو د عامه پوهاوی په پار نندارې ته وړاندې شول.
په یاد نندارتون کې د مارجې ولسوالی د کرنې د چارواکو ترڅنګ ګڼو بزګرو برخه اخیستې وه ترڅو عام ځمکوال د اصلاح شویو تخمونو په ارزښت وپوهول شي او دوی وهڅول شي ترڅو د اصلاح شویو تخمونو د کرلو له لارې لوړ حاصلات او عاید ترلاسه کړي .
یاد تخمونه چې د هلمند ولایت د خاورې، اوبو او هوا سره د توافق ترڅنګ د نباتي ناروغیو په وړاندې مقاومت لري د مارجې ولسوالی په ګډون د ګڼو ولسوالیو بزګرو ته په وړیا ډول په واک کې ورکول شوي دي، چې دا مهال ټولې کروندې حاصلاتو ته رسېدلي دي.
د هلمند د کرنې ریاست هڅه کوي ترڅو هلمند کې د اصلاح شویو تخمونو د ترویج او تکثیر له لارې د بزګرو په کرنیز اقتصاد کې د پام وړ بهبود او نوښت رامنځته کړي.
