لوګر کې د ځنګلونو خوندیتوب په پار هلې ځلې
د لوګر د کرنې، اوبولګولو او مالدارۍ رياست په دې ولایت کې د ځنګلونو خوندیتوب او پراختيا په پار هڅې پیل کړي دي.
په همدې موخه تېره ورځ د ازرې ولسوالی قومي مشرانو، سپین ګیرو او میشتو قومونو سره د لرګو د پرېکېدو د مخنیوي په پار د ګډه ناسته وشوه.
په جوړه شوی ګډه ناسته کې د لوګر دکرنې ریاست د ازرې ولسوالی د کرنې مدیریت کارکوونکو او دیني علماوو له لوري ګډونوالو ته د ځنګلونو د پرېکېدو د مخنیوي او دځنګلولونو د ساتلو، دځنګلونو د اقتصادي ارزښت په ځانګړې توګه د جلغوزیو په ارزښت او د ځنګولونو د بیا احیا په تړاو لازمې لارښوونې وشوې، او ددې ولسوالی له خلکو او چارواکو یې وغوښتل، چې د ځنګلونو د ساتنې او پراختيا په برخه کې له دوی سره مرستې او همکارۍ وکړي.
په همدې حال کې د ازرې ولسوالی قومي مشرانو په یاده برخه کې د هرډول همکاریو ډاډ څرګند کړل.
ازره ولسوالی د لوګر ولایت لیرې پرته غرنیزه ولسوالی ده، چې ډیرۍ غرونه یې په ځنګلونو پوښل شوي دي.
