د ننګرهار کوز کونړ ولسوالی پر يوشمېر کروندګرو د غنمو رېبلو واړه ماشينونه ووېشل شول
۱۵ وری ۱۴۰۲ه.ش
۱۳ رَمَضانُ المُبارَک ۱۴۴۴ ه.ق
د ننګرهار ولایت د کرنې، اوبولګولو او مالدارۍ ریاست وايي چې د خوړو نړيوال پروګرام "WFP" په مالي او د (SARCDO) موسسې په تخنیکې همکارۍ د ننګرهار ولایت د کرنې، اوبولګولو او مالدارۍ ریاست تر چتر لاندې د کوزکونړ ولسوالی د کوټي تاران سیمه کې کروندګرو ته د غنمو رېبلو واړه ماشینونه د ننګرهار د کرنې، اوبولګولو او مالدارۍ رييس مولوی عبدالستار محمد لخوا ووېشل شول.
په دې اړه غونډه کې د ننګرهار د کرنې رييس په خپلو خبرو کې یادونه وکړه، چې دا هغه ۲۰۰ ثبت شوي بزګران دي چې پخوا ورته د غنمو اصلاح شوي تخمونه او کیمیاوي سرې ورکړل شوي وې، چې ذکر شوي بزګران په څلورو ګروپونو وېشل شوي، چې دمګړۍ د تشویق او ملاتړ په موخه د څلورو ګروپونو کروندګرو ته د یومیلیون او اتیا زره افغانیو په ارزښت ۱۰ عرادې د غنمو رېبلو او قلبه کولو واړه ماشینونه ووېشل شول.
محمد زیاته کړه، چې دننګرهار د کرنې اداره ژمن ده تر څو د کروندګرو د ملاتړ او تشویق لپاره دې ته ورته نورې ګټوري پروژې په لاره واچوي او د خپلو کروندګرو اقتصاد پیاوړي کړي.
