ننګرهار کې د څارویو د خوندیتوب په پار هڅې: په ۲۱ ولسوالیو کې د څارویو د لېونتوب مخنیوی په موخه د واکسینو کمپاین پیل شو
د ننګرهار دکرنې، اوبولګولو او مالدارۍ ریاست د «IFAD» دفتر په مالي او د افغانستان لپاره د هالنډ کمېټې (DCA) په تخنیکي همکارۍ د ننګرهار ولایت 21 ولسواليو کې د څارويو د روغتيا، د مالدارۍ د مديريت او د حیواني محصولاتو بازار موندنې په موخه پروژې پلي کوي.
د ننګرهار دکرنې، اوبولګولو او مالدارۍ ریاست د مالدارۍ خدمتونو او څارویو روغتیا آمر ډاکټر محمدضمیر بهسودي وویل، چې په دغو پروژو کې د ننګرهار په ۲۱ ولسوالیو کې د څارویو د لېونتوب مخنیوی په موخه د واکسینو کمپاین شامل دی، چې دا لړۍ د بهسودو ولسوالی د بینګاه کلی څخه پیل شو.
د ښاغلي بهسودي په خبره د سیمه ییزو وټرنرانو له خوا د دوو کمپاینونو په ترڅ کې به پر څارویو ۲۷۶ زره او ۷۰۰ ډوزه واکسینونه او ۳۷۰ زره ډوزه د چنجیو ضد درمل پلي شي.
ددې کمپاین موخه د مالدارانو د څارویو خوندیتوب، د مالدارۍ سکټور پیاوړتیا او په ټوله کې د مالدارانو اقتصادي وړتیاوې لوړول دی.
