د لوګر دکرنې رییس: سږني عوایدو کې د پخوا په پرتله ۶۰ سلنه زیاتوالی راغلی

د لوګر دکرنې، اوبولګولو او مالدارۍ رییس مولوی سید امین هاشمي وایي، چې د ۱۴۴۴ ام هجري قمري کال له پیل څخه تر دې دمه په دې ریاست کې نږدې ۱۸ میلیونه افغانۍ راټول شوي دي.
د ښاغلي هاشمي په خبره دغه عواید د سږني ۱۴۴۴ کال د شپږو میاستو په موده کې د عشر، د تراکتورنو او ځمکو د اجارې، د سرکاري باغچو (ځنګلونو) د پلورلو او دغه راز فارمونو او د دغه ادارې د یو شمېر نورو جایدادونو د کرایې له لارې ترلاسه کړي دي.
د لوګر دکرنې، اوبولګولو او مالدارۍ رییس مولوی سید امین هاشمي وویل، چې د سږني۱۴۴۴قمري کال عوایدو کې د پخوا په پرتله ۶۰ سلنه زیاتوالی راغلی، چې دا زیاتوالی شفافیت او روڼوالی په ډاګه کوي .
ښاغلي هاشمي زیاته کړه، یاد راټول شوي عواید د مرکز او ولسوالیو څخه لاسته راغلي، چې د دولت حساب ته تحویل شوي دي.