د ننګرهار په خوګیانو کې پر ۴۸ ښځینه کروندګرو کرنیز توکي ووېشل شوې

۹ زمری ۱۳۹۸
د ننګرهار دکرنې، اوبولګولو او مالدارۍ ریاست د کرنې د ودې او کلیوالي پراختیا پروژې « CBARD» له لارې ددې ولایت په خوګیانو ولسوالۍ کې پر ۴۸ ښځینه بزګرانو د کرکېلي اړونده توکي وېشلي دي.
د ننګرهار د کرنې رییس انجنیر سمیع الله نصرت وايي؛ د شنوخونو اړوند دغه وېشل شوي ۱۳ توکي، چې د کرنې ریاست په هلو ځلو د کرنې د ودې او کلیوالي پراختیا پروژې له خوا پر دغو مېرمنو وېشل شوي دي په کې «دواپاش، کراچی، بېلچه، رمبه، قیچي، اوبه پاش، دست کشې، د تخم شیندلو پتنوسونه او داسې نور اړین توکي» شامل دي.
په هغه غونډه کې، چې په همدې موخه جوړه شوې وه له دغو مرستو څخه برخمن شوي مېرمنې د کرنې وزارت له مرستو مننه وکړه او ویې ویل، چې ددغو توکو په ترلاسه کولو سره به د دوی ډېرې ستونزې هوارې شي.
د ننګرهار د کرنې رییس وایي له دغو توکو څخه برخمن شوي بزګرانې ته په کورنیو باغچو کې د سبو او ترکاریو د کرکېلي په هکله روزنه هم ورکړل شوې ده.
له یادو مرستو څخه موخه په دې ولایت کې د شنوخونو دودول د بېوزلو مېرمنو ملاتړ او د بزګرو کورنیو د عوایدو زیاتول دي.