دکرنې وزارت مالي او دارې مرستیال د ننګرهار کانال تاسیساتو څخه لیدنه وکړه

دکرنې، اوبولګولو او مالدارۍ وزارت مالي او اداري مرستیال مولوی فضل الباري فضلي، د یو پلاوي په مشرۍ، ننګرهار ولایت ته د خپل سفر په ترڅ کې د ننګرهار کانال ریاست بېلابېلې سیمې له نږدې وکتل او اړوندو چارواکو ته لازمې سپارښتنې وکړې.
ښاغلی فضلي د ننګرهار کانال ریاست اړوند ورکشاپ، ماشينرۍ مديريت، غوچکو بړوق، لمریزې پروژې، زيتونو او نجارۍ فابريکو، مالدارۍ امريت، ترانسپورت مديريت او نورو سیمو څخه دلیدنې په ترڅ کې اړوندو چارواکو ته لازمې لارښوونې او سپارښتنې وکړې. 
ددې لیدنې په ترڅ کې د ننګرهار کانال رییس مولوی غلام الرحمن کظیم او ددې ادارې یوشمېر کارکوونکو د مالي او اداري مرستیال مولوي فضل الباري فضلي ملتیا کوله. ښاغلي فضلي په خپلو خبرو کې د ننګرهار کانال د هېواد په کچه د غوره کرنیز سیسټم بېلګه وبلله او ننګرهار کانال د ښه والي او آبادۍ په هکله دکرنې وزارت د رهبرۍ پر هلو ځلو خبرې وکړې هغه وویل، چې د ننګرهار کانال یوکرنیز بنسټ دی، چې افغانستان ځان بسیاینې ته نږدې کوي، په همدې موخه دکرنې وزارت غواړي، چې د ننګرهار کانال پیاوړي کړي.
دا پلاوي د کرنې، اوبولګولو او مالدارۍ وزیر مولوی عطاءالله عمري د حکم پر اساس ددې وزارت مالي او اداري مرستیال مولوی فضل الباري فضلي په مشرۍ د ننګرها کانال د قرادادونو ارزونې، د ننګرهار کانال سیمې د ځمکو تثبیت او ددې کانال د غصب شویو ځمکو بېرته راګرځولو او دغه راز د نورو ځمکو دغصب مخنیوی، د ننګرهار کانال د پورونو بېرته اخیستنې، چې د مختلفو دلیلونو پر بنسټ تر دې دمه پر پوروړو پاتې دي او د ننګرهار کانال په ساحه کې د نویو عایداتي سرچینو تشخیص په پار ننګرهار ولایت ته سفر کړی دی.