د ننګرهار کانال ریاست: د هډې فارم پنځم بلاک کې د مالټې بڼونه جوړېږي
۹ سلواغه ۱۴۰۱ه.ش
۷ رَجَب المُرَجَّب ۱۴۴۴ ه.ق
د ننګرهار کانال ریاست چارواکي وایي، چې دیاد ریاست اړوند دهډې فارم پنځم بلاک شاوخوا کې د مالټو نږدې ۱۱۷ جریبه نوي بڼونه جوړېږي.
د چارواکو په خبره د هډې فارم پنځم بلاک شاوخوا کې د ۱۱۷ جریبه مالټو بڼونو د جوړولو چارې روانې دي، چې ټولیز لګښت یې ۱۲ میلیونه افغانۍ ده او لسګونو کسانو ته په کې د کار زمینه برابرېږي.
د ننګرهار د کانال ریاست چارواکي وایي، چې ددې پروګرام په پلي کولو سره به په دې سیمه کې شاړې ځمکې ابادې او ورسره به د سیمې زرغونتیا او ښېرازۍ ته هم زمینه برابره او ترڅنګ به یې ددې ولایت د مالټو د حاصلاتو کچه هم لوړ شي.
ننګرهار د سټروسو مېوو لکه مالټې، نارنج او لیمو ونو لپاره مناسب اقلیم لري او په دې وروستیو کې په دغه ولایت کې دسټورو سلګونه جریبه بڼونه جوړ شوي دي.
