د افغانستان لپاره د ناروې کمیټې چارواکو د پکتیا د کرنې له رییس سره وکتل
۱۲ مرغومې ۱۴۰۱ه.ش
۹ جُمادیَ الثّاني ۱۴۴۴ ه.ق
د پکتیا دکرنې، اوبولګولو او مالدارۍ ریاست وایي، چې د افغانستان لپاره د ناروې کمیټې چارواکو د پکتیا دکرنې رییس الحاج مولوي عبدالرؤف سعيد سره د همغږۍ ناسته ترسره کړه.
په دې ناسته کې د يادې کميټې چارواکو هر يو شفیق الله منګل، ذبیح الله تنویر،کلیم الله احمدزي، د پکتیا د کرنیزو چارو آمرعبدالله حلیم زي، د مالدارۍ آمر نورالله، د طبیعي سرچینو آمر زاهب الله ارسلا او د يادې ادارې عمومي مديرانو ګډون کړي ؤ.
په ناسته کې د يادې کميټې له لورې د ترسره شويو پروژو په اړه راپور شريک او د ۲۰۲۳ کال لپاره په پکتيا ولايت کې د ترسره کېدوونکو فعالیتونو د ډل بندۍ په اړه د ګډونوالو له لورې نظرونه شريک شول.
د پکتیا دکرنې رییس مولو عبدالرؤف سعید د يادې کميټې له چارو څخه د خوښي ترڅنګ له دوی سره د چارو د ښه تنظيم او پروژو د موثر تطبيق په برخه کې د هر راز همکارۍ ژمنه وکړه، له دوی یې وغوښتل چې خپلې پروژې د کرنې رياست سره په همغږۍ سرته ورسوي.
د يادولو وړ ده چې يادې کميټې په پکتيا ولايت کې لسګونه زره کورنيو ته اصلاح شوي غنم او کيمياوي سرې، حيواني خوراکه او د چرګانو فارمونه ويشلي او پاتې نورې چارې يې دوام لري.
