د ننګرهار په رودات کې پر ۳۶ ښځینه کروندګرو د شنوخونو اړونده توکي ووېشل شوې

۶ زمری ۱۳۹۸
د ننګرهار دکرنې، اوبولګولو او مالدارۍ ریاست ددې ولایت په روداتو ولسوالۍ کې پر ۳۶ښځینه بزګرانو د شنوخونو اړونده توکي وېشلي دي.
د ننګرهار د کرنې رییس انجنیر سمیع الله نصرت وايي؛ د شنوخونو اړوند دغه وېشل شوي ۱۳ توکي، چې د کرنې ریاست له خوا پر دغو مېرمنو وېشل شوي دي په کې «دواپاش، کراچی، بېلچه، رمبه، قیچي، اوبه پاش، دست کشې، د تخم شیندلو پتنوسونه او داسې نور اړین توکي» شامل دي.
په هغه غونډه کې، چې په همدې موخه جوړه شوې وه د روداتو ولسوال سیدعلي اکبر سادات له بزګرانو سره د کرنې وزارت له مرستو مننه وکړه او زیاته یې کړه، چې ددغو توکو په وېشلو سره به د کرنې په برخه کې د برخمن شویو ښځینه بزګرانو ستونزې تر ډېره هوارې شي. 
د ننګرهار د کرنې رییس وایي له دغو توکو څخه برخمن شوي بزګرانې ته په کورنیو باغچو کې د سبو او ترکاریو د کرکېلي په هکله روزنه هم ورکړل شوې ده. 
له یادو مرستو څخه موخه په دې ولایت کې د شنوخونو دودول د بېوزلو مېرمنو ملاتړ او د بزګرو کورنیو د عوایدو زیاتول دي.