د میدان وردګو ولایت د غصب د مخنیوي او غصب شوو ځمکو د استرداد تخنیکي ټیم غونډه تر سره شوه
د میدان وردګو ولایت د غصب د مخنیوي او غصب شوو ځمکو د استرداد تخنیکي ټیم د چارو د پیل لپاره د لازمو پرېکړو اړوند لومړنۍ غونډه تر سره شوه.
ياده غونډه چې د میدان وردګو ولایت د کرنې ریاست کې جوړه شوې وه، پکې د میدان وردګو ولایت د کرنې رییس مولوي عبدا لجبار (خالد) د تخنیکي ټیم رییس په توګه، او دعدلیې رییس، دښارجوړونې رییس، د کاراو ټولنیز دچارو رییس، دارشادحج او اوقافو رییس، د څارنوالۍ رییس،د امنیې قومندانۍ مرستیال، د ښاروالۍ ریاست استازی،د مستوفیت رییس د اراضي د کدستر د سروې مدیر دغړو په توګه شتون درلود.
د غونډې په پیل کې د میدان وردګو ولایت دکرنې رییس مولوی عبدالجبار خالد وینا وکړه او په هغو ستونزو او مشکلاتو يې رڼا واچوله چې د میدان وردګو ولایت د غصب د مخنیوي او غصب شوو ځمکو د استرداد تخنیکي ټیم به ورسره د کار په جریان کې مخامخ کېږي.
نوموړي د خپلو خبرو په جریان کې زیاته کړه چې د غصب د مخنیوي او غصب شوو ځمکو د استرداد تخنیکي ټیم ته د افغانستان اسلامي امارت د مشرتابه لخوا ډېر دروند مسؤلیت ورسپارل شوی چې د یاد مسؤلیت د ښه پرمخ وړلو لپاره په چارو کې اخلاص او صداقت ته اړتیا ده او یاد تخنیکي ټیم باید په ګډه د افغانستان اسلامي امارت د مشرتابه لخوا ورسپارل شوی مسؤلیت په ښه شان سره ترسره کړي.
د غونډې په جریان کې د تخنیکي ټیم غړو په نوبتي ډول خپل نظریات شریک کړل او د تخنیکي ټیم د چارو د منظم پرمخ وړلو لپاره په ځینو اړینو مسایلو اړوند خبرې اترې وشوې.
