د کونړ په دوو ولسوالیو کې د کانالونو پاکولو او استنادې دېوالونو چارې بشپړ او ګتې اخیستنې ته وسپارل شول
۱۴ لړم ۱۴۰۱ه.ش
۱۰ ربیعالثانی ۱۴۴۴ ه.ق
دکونړ دکرنې، اوبولګولو او مالدارۍ ریاست وایي، چې ددې ولایت د اسمار او نورګل په ولسوالیو کې د (FGA) مؤسسې په همکارۍ پر بزګرانو د غنمو د اصلاح شویو تخمونو او کیمیاوي سرو دوېش ترڅنګ په یاد ولسوالیو کې د کانالونو د پاکولو او استنادي دېوالونو د جوړولو پروژې بشپړ او په یادو پروژو کې دوه زره اړمنو بوختو کسانو ته د کار په بدل کې نغدې پیسې وېشلي دي.
د چارواکو په خبره د اسمار او نورګل په ولسوالیو کې د ۱۳۰ کیلومتره کانالونو پاکولو، د ۳۷۶ متره استنادي دېوالونو او نور اړوند ودانیزې چارې بشپړ او ګټې اخیستنې ته وسپارل شول.
د کونړ دکرنې ریاست چارواکي وایي: «د دغې پروژې په لړ کې دوه زره بزګرانو ته د اصلاح شوي تخم او کېمياوي سرې ورکړې ترڅنګ د عامه پوهاوي پروګرامونه تطبیق کړي او پلان لري، چې دغو ولسوالیو کې د غنمو ننداریزې قطعې هم جوړې کړي، ترڅو بزګزان وکولی شي د کتار کرل دود او حاصلاتو کې یې لوړ والی رامنځته شي. »
ددغو مرستو موخه په دې ولایت کې د کرنیزو حاصلاتو زیاتوالی او د بېوزله بزګرانو اقتصادي ودې ته زمینه برابرول دي.
