د لوګر دکرنې ریاست: د برکي برک ولسوالی له چارواکو او د عشر عاملینو سره غونډه وشوه

۷ چنګاښ ۱۴۰۱ ه‍.ش
۲۹ ذوالقعده ۱۴۴۳ ه‍.ق
د لوګر دکرنې، اوبولګولو او مالدارۍ ریاست وایي، چې ددې ولایت د برکي برک ولسوالی چارواکو او د عشر عاملینو سره د همکارۍ او همغږۍ په پار غونډه وشوه.
په دې غونډه کې، چې د برکي برک ولسوالی په مقام کې جوړه شوې وه د لوګر د کرنې، اوبولګولو او مالدارۍ رییس مولوی سید امین هاشمي، د برکي برک ولسوال حاجي ملا انارګل، د کرنیزو چارو مدیر مولوی محمد ولي هاشمي، په سیمه کې د عشر ټولولو مسوولینو ګډون درلود.
د غونډې په پیل کې د لوګر دکرنې رییس مولوی سید امین هاشمي د عاملینو لپاره کاري طرزالعمل ولوست او زیاته کړه، چې د اسلامي نظام مسؤولینو یوه دنده په کلیو کې د عشر ټولول او د عاملینو سره پوره همکاري ده، او په دی کار کې اخلاص، صداقت او شفافیت اړین توکي دي، چې باید دعمل جامه ور واغوندو.
ورپسې د برکي برک ولسوال په خپلو خبرو کې وویل، کوم اصول او ضوابط چې موږ ته خپل خالق او امیرانو ټاکلي په ځان یې تطبیق او عملي کوو. هغه دغه راز عاملینو ته د همکاریو پوره ډاډ ورکړ.
په همدې حال کې عاملینو هم په خپلو خبرو کې وویل: «که شپه وی یا ورځ د شرعي نظام کلک ملاتړ یو او ملت ته به خدمت کوو».