پکتیکا کې له ۳۵۰ مالدارانو سره د څارویو د خوراکي توکو مرسته وشوه

۶ لیندۍ ۱۳۹۹
د پکتیکا دکرنې، اوبولګولو او مالدارۍ ریاست د «ORD» موسسې په مرسته ددې ولایت له ۳۵۰ مالدارانو سره، چې کوچیان هم په کې شامل دي د څارویو د خوراکي توکو مرسته وکړه.
په دې اړه جوړه شوې غونډه کې د پکتیکا مرستیال والي انجنیر شېربادشاه ارګونی او یوشمېر سیمه ییزو چارواکو ګډون درلود.
د پکتیکا مرستیال والي انجنیر شېربادشاه ارګوني وویل،‎: «دولت ژمن دی څو د بې وزله او ناچاره ولسونو لاس نیوی وکړي او د ښه ژوند زمینه ورته برابره کړي.» مرستیال والي زیاته کړه، کوښښ کوي څو ټولو برخو کې د کوچیانو په ګډون خلکو ته د مالدارۍ برخه لا پیاوړي کړي، څو ولسونه پر ځان بسیا شي.
د پکتیکا د کرنې ریاست وایي، چې د څارویو وېشل شوي خوراکي توکي ۱۴ ډوله ګټورو موادو څخه جوړ شوي، چې د څارویو د تقویې لپاره خورا ګټور خوراکي توکي دي.
یادو چارواکو دغه راز وویل، چې راتلونکې کې به ددې ولایت له یوزر او ۱۰۰ نورو مالدارو کورنیو سره به هم ورته مرستې ووشي.
ددغو مرستو موخه دمالدارو کورنیو او کوچيانو ملاتړ او دمالدارانو اقتصادي ودې ته زمينه برابرول دي.