کندهار کې د پستې څه باندې درې زره جریبه بڼونه جوړ شوي دي

۳ غویی ۱۳۹۹
د کندهار د کرنې، اوبولګولو او مالدارۍ ریاست وایي، چې د همکارو موسسو او خلکو په همکارۍ په تېرو څو کلونو کې په دې ولایت کې د پستې څه باندې درې زره جریبه بڼونه جوړ شوي دي، چې ډېره ښه پایله یې هم ور کړې ده. 
د کندهار د کرنې ریاست وایي، چې پسته د کندهار له اقلیمي شرایطو سره ښه توافق لري او په دې ولایت کې د پستې د سوداګریزو بڼونو د جوړولو په پار یې په روان کال کې د کرنې وزارت د بڼوالۍ او مالدارۍ ملي پروژې «NHLP» په مرسته د ۱۲۰۰ نوي بڼونو دجوړولو په پار پر ۲۲۰ بزګرانو د پستې ۴۸۰ کیلو تخمونه او پلاستیکي کڅوړې وېشلي او یادو بزګرانو ته د پستې د تخمونو د کرکېلي لارې چارې هم ښودلي دي. دغه راز تېرکال په دې ولایت کې د پستې ۷۰۰ جریبه بڼونه هم پیوند شوي دي.
په کندهار کې د پستې څه باندې درې زره جریبه نوي بڼونه په داسې حال کې جوړ شوي دي، چې یاد ولایت د تازه مېوو له ډلې انګور او انارو په برخه کې مخکښ ولایت دی. د دغو بڼونو ښې پایلې نور کروندګر هم هڅوی، چې په خپلو ځمکو کې د پستې بڼونه جوړ کړي.
د کندهار ولایت د کرنې، اوبولګولو او مالدارۍ ریاست وایي: «له نېکه مرغه په دې وروستیو کې د پستې د بڼونو جوړولو او ترویج په پار هلې ځلې کړندي شوي دي او خلک د پستې بڼونو جوړولو ته لېوال شوي دي.» 
د کندهار د کرنې ریاست چارواکي وایي، چې په راتلونکو څو کلونوکې د انارو، انګورو او انځرو ترڅنګ پسته به هم ددې ولایت د صادراتو په لست کې شامل شي.
باید وویل شي، چې پسته په افغانستان کې یو له مهمو اقتصادي نباتانو څخه ګڼل کیږي، چې د یوشمېر هېوادوالو د اقتصاد لویه برخه جوړوي.