ننګرهار کې د ۲۰ میلیونه افغانیو په لګښت د چرګانو د دانې تولیدي فابریکه فعالیت پیل کړ
۲ سلواغه ۱۴۰۴ه.ش
۳ شَعبان المُعَظّم ۱۴۴۷ه.ق
د ننګرهار ولایت، د شیخ مصري صنعتي ښارګوټي کې د یو افغان پانګوال، ډاکتر عظیمالله میاخېل له لوري د شل میلیونه افغانیو په لګښت د «عجوه» په نوم د چرګانو د دانې د تولید یوه لویه فابریکه تازه فعالیت پیل کړ.
د یادې فابریکې د پرانیستې په مراسمو کې د ننګرهار د کرنې ریاست د مالدارۍ خدمتونو او څارویو د روغتیا آمر ډاکتر محمد ضمیر بهسودي، د خصوصي سکتور د بېلابېلو برخو مسؤلینو او یو شمېر پانګوالو ګډون کړی و.
د فابریکې مسؤل ډاکتر عظیمالله میاخېل د پرانیستې پر مهال د فابریکې د بېلابېلو څانګو په اړه معلومات ورکړل او ویې ویل، چې یاده فابریکه په ۲۴ ساعتونو کې د ۲۴۰ ټنه چرګانو د دانې د تولید وړتیا لري. نوموړي زیاته کړه، چې د فابریکې ډېری خام مواد له کورنیو تولیداتو څخه برابرېږي.
په همدې حال کې د ننګرهار دکرنې ریاست د مالدارۍ خدمتونو او څارویو د روغتیا آمر ډاکتر محمد ضمیر بهسودي د یادې فابریکې د پرانیستې هرکلی وکړ او دا یې د چرګانو د سکتور د پیاوړتیا او ځانبسیاینې په برخه کې یو مهم او ګټور ګام وباله. هغه د فابریکې مسؤلینو ته سپارښتنه وکړه، چې د دانې کیفیت ته ځانګړې پاملرنه وکړي او د کرنې وزارت له لوري د ټاکل شویو معیارونو مطابق تولیدات بازار ته وړاندې کړي.
ورپسې د پولټري ډاکترانو د اتحادیې رییس ډاکتر حسیبالله ترهکي هم خبرې وکړې او د چرګانو د ناروغیو د تشخیص او مخنیوي په برخه کې یې د پوره همکارۍ ډاډ ورکړ.
د یادونې وړ ده، چې په دې فابریکه کې سلګونو کسانو ته په مستقیم او غیر مستقیم ډول د کار زمینه برابره شوې، چې دا چاره به د اقتصادي ودې او د کارموندنې په برخه کې هم مهم رول ولوبوي.
