د هلمند د کرنې ریاست نوی رییس معرفي شو
۳۰ لیندۍ ۱۴۰۴ هـ.ش
۳۰ جُمَادَى الثاني ۱۴۴۷ هـ.ق
د افغانستان اسلامي امارت د رهبري د لارښوونې له مخې، مولوي شیراحمد رفیع د هلمند د کرنې، اوبو لګولو او مالدارۍ ریاست ته د نوي رییس په توګه معرفی شو.
د معرفی مراسم د دې ریاست د غونډو په تالار کې د هلمند مرستیال والي مولوی محمد نبي حماس، یوشمېر سیمه ییزو چارواکو، عماو او ګڼ شمېر کارکوونکو په حضور کې ترسره شو. په دغو مراسمو کې، د نوي رییس د ګمارنې حکم د کرنې وزارت د استازي له خوا ولوستل شو.
په دې غونډه کې، د هلمند مرستیال واي مولوی محمد نبي حماس وینا وکړه او له کارکوونکو یې وغوښتل، چې له نوي رییس سره هر اړخیزه همکاري وکړي. هغه څرګنده کړه، چې د اسلامي امارت په نظام کې د ادلون بدلون او ګمارنې یو اصل دی.
ښاغلی حماس په خپلو خبرو کې دکرنې ریاست کارکوونکي اتحاد او اتفاق ته راوبلل او غوښتنه یې وکړل ترڅو مسلمانانو ته په ښه ډول خدمات وړاندې کړي ، هغه وویل په اداراتو کې تغیر او تبدیل د چارو د لا سمښت او بهبود په موخه ترسره کیږي. همدارنګه د هلمند دکرنې ریاست مخکني رییس مولوي نیازمحمد وهاج خدمتونه یې وستایل او راتلونکي کې یې په نوې دنده کې ورته د لا زیاتو خدمتونو د توفیق دعا وکړه.
ورپسې دهلمند د کرنې، اوبو لګولو او مالدارۍ ریاست مخکنی رییس مولوي نیازمحمد وهاج د دې ریاست لپاره دنوي ټاکل شوي رییس مولوي شیراحمد رفیع ته د ښه راغلاست ترڅنګ دښو خدمتونو ترسره کولو هېلې وړاندې کړې.
په همدې حال کې د هلمند دکرنې نوې ټاکل شوی رییس مولوي شیراحمد رفیع خبرې وکړې، د اسلامي امارت د مشرتابه له احکامو یې د اطاعت ژمنه وکړه، د خلکو خدمت ته یې ژمنتیا څرګنده کړه، او د ریاست له کارکوونکو یې د ملاتړ مننه وکړه.
