بغلان کې د کروندې ورځ ولمانځل شوه
۶غبرګولی ۱۴۰۴ ه.ش
۲۹ ذُوٱلْقَعْدَةِ ۱۴۴۶ه.ق
د بغلان ولایت د کرنې، اوبولګولو او مالدارۍ ریاست په نوښت، او د تمدن د اصلاح شوو تخمونو د تولید شرکت په همکارۍ، د پلخمري ولسوالی د قاضي په کلي کې د کروندې ورځ ولمانځل شوه.
په دې مناسبت جوړو شوو مراسمو کې د بغلان د کرنې ریاست د کرنیزو چارو آمر، اړوند مدیران، د تخمونو تولید شرکتونو استازي، د ملګرو ملتونو دخوړو او کرنې ادارې «اف،اې،او» استازي، او د پلخمري ولسوالی له بېلابېلو سیمو راغلي مخکښ بزګران ګډون درلود.
ددې ناستې ګډونوالو ته د کرنې متخصصینو له خوا د اصلاح شوو غنمو د تولید، کر او پالنې، او د نباتي ناروغیو د مخنیوي او درملنې په اړه هر اړخیز معلومات وړاندې شول.
یاد پروګرامونه د بزګرانو د پوهې لوړولو، اصلاح شوو تخمونو ته د لاسرسي، او د کرنیزو حاصلاتو د زیاتوالي په برخه کې مهم بلل کېږي.
