لغمان کې د کوچي مالدارانو لپاره د څښاک اوبو پروژه ګټې اخیستنې ته وسپارل شوه
۶ غویی ۱۴۰۴ ه.ش
۲۸ شَوّالُ المُکَرَّم ۱۴۴۶ه.ق
د لغمان د کرنې، اوبولګولو او مالدارۍ ریاست تر چتر لاندې، د افغانستان لپاره د هالینډ کمېټې ډي سي اې په مالي لګښت، د مرکز اړوند ماڼو سیمې مېشتو کوچي مالدارانو ته د څښاک اوبو د برابرولو پروژه بشپړه او ګټې اخیستنې ته وسپارل شوه.
د پروژې د پرانستې مراسمو کې د لغمان د اقتصاد رییس مولوي جان محمد حامد، د کرنې ریاست د مالدارۍ او څارویو روغتیا آمر ډاکټر جوادالله عليزاده، د طبیعي سرچینو آمر مولوي سمیع الحق شهامت، د هالینډ کمیټې مرکزي مسؤول ډاکټر قیومي، د یادې پروژې ولایتي مسؤول ډاکټر محمد بیدار سیرت او د سیمې اوسېدونکو ګډون کړی وو.
د دې پروژې په ترڅ کې کوچي مالدارانو ته د اوبو دوه زېرمې او د څارویو دوه ابخورونه جوړ شوي، چې هره زېرمه نږدې ۳۱ متر مکعب اوبو ظرفیت لري. له دغو اسانتیاوو څخه به څهباندې ۱۲زره څاروي او ۱۵۰ کورنۍ ګټه پورته کړي.
د سیمې اوسېدونکو دا پروژه یوه مهمه لاسته راوړنه وبلله او څرګنده یې کړه چې د صحي او پاکو اوبو کمښت یې یوه لویه ستونزه وه، چې د دې پروژې په ګټې اخیستنې سره به دا ستونزه تر ډېره هواره شي.
