اروزګان کې شخوند وهونکو څارویو ته د طاعون واکسین کمپاین پیل شو
د اروزګان ولایت د کرنې، اوبو لګولو او مالدارۍ ریاست لخوا د کوچنيو شخوند وهونکو څارویو د طاعون ناروغۍ پر وړاندې د واکسین د وېش او تطبیق کمپاین په رسمي ډول پرانیستل شو.
دا پروګرام د اروزګان ولایت د کرنې، اوبو لګولو او مالدارۍ ریاست استازو، د ملګرو ملتونو د کرنې او خوړو نړۍوالې ادارې د مسولینو، د مالدارۍ آمریت کارکوونکو او د سیمه ییزو وترنري کلینیکونو چارواکو په شتون کې ترسره شو.
د اروزګان دکرنې ریاست چارواکو په خپلو خبرو کې وویل، په دې کمپاین کې به ۶۵۰۰۰ ډوزه واکسین د کرنې وزارت له لارې او د ملګرو ملتونو د کرنې او خوړو نړیوال سازمان په همکارۍ، د ولایتي کچې د سیمه ییزو وترنري کلینیکونو له لارې به ددی ولایت په مرکز او ټولو ولسوالیو کې پلي شي.
د دې واکسین د تطبیق موخه د ناروغۍ د خپریدو مخنیوی، د څارویو د مړینې کمول او د اروزګان ولایت د څارویو د بزګرانو د اقتصاد ملاتړ کول دي.
دا پروګرام د کرنې، اوبو لګولو او مالدارۍ وزارت د هغو هڅو یوه برخه ده چې په هېواد کې د څارویو روغتیا ښه کولو او د څارویو پیاوړتیا او لوړ محصولاتو د تولید په موخه ترسره کېږي.
