ننګرهار وادي کرنیز امارتي شرکت د زیتون بڼونو پاکولو او جغل تولید پروژه پيلوي

۹ کب ۱۴۰۳ه‍.ش
۲۸ شَعبان المُعَظّم ۱۴۴۶ه‍.ق
ننګرهار وادي کرنیز امارتي شرکت د خپلو څلور ګونو فارمونو د زیتون بڼونو د ځمکو د تیږو د بارو څخه د تخلیې او جغل تولید پروسه پیلوي.
د یاد شرکت د سوداګرۍ او بازارموندنې رئیس انجنیر ندي الله «نیازي» په یو رسنیز کنفرانس کې وویل، چې د دې پروسې موخه د زیتون بڼونو ځمکې پاکول او د ۲زره او ۴۰۰ جریبه ځمکې کرنې ته چمتو کول دي.  
د نوموړي په وینا، له راټولو شویو تیږو څخه به جغل تولید شي، چې د سړکونو او ودانیو په جوړولو کې به ورڅخه کار اخیستل کېږي. هغه زیاته کړه، چې دا به نه یوازې د کرنیزو فعالیتونو ښه والي ته زمینه برابره کړي، بلکې د کرنیزو محصولاتو کیفیت به هم لوړ کړي.  
اقتصادي او کرنیز متخصصین باور لري، چې دا اقدام به کروندګرو ته ګټه ورسوي، د شرکت عواید به زیات کړي او د سیمې د زیربنایي پروژو په پرمختګ کې به مهم رول ولوبوي.