د ننګرهار د هسکې مینې ولسوالۍ د کرنې او مالدارۍ د پراختیا په پار اته لویې پروژې پلي کیږي

۱۴لړم ۱۳۹۸
د امنیت شورا دریاست سلاکار سرور احمدزی په مشرۍ د ۱۴ وزارتونو مرستیالانو د ننګرهار والي او سکتوري ادارو مشرانو د ګډې غونډې په ترڅ کې د هسکې مېنې ولسوالۍ لپاره پراختیایي پلان جوړ او د تطبیق په موخه شریک شو.
د امنیت شورا د ریاست سلاکار په مشرۍ د راغلي پلاوي په ترکیب کې د کرنې، اوبولګولو او مالدارۍ وزارت اداري معین عبدالهادي رفیعي هم ګډون درلود. ښاغلي رفیعي وویل، چې په ۱۳۹۹ کال کې به د هسکې مینې د جودرې، احمدخېلو، معین کس، شابیو، ګورګورۍ او پاپین سربندونه ورغول شي، چې پر مټ به یې زرګونه جریبه ځمکه خربوې شي او د اوبولګولو ستونزه به حل شي.
د ښاغلي رفیعي په خبره ددې ترڅنګ به د کرنې، اوبولګولو او مالدارۍ ریاست اړوند د د بڼوالۍ او مالدارۍ ملي پروژې «NHLP» له لوري د چرګانو روزنې ۱۰ فارمونه، ۲۰ جریبه د مېوو بڼونه او ۱۴۰ شنې خونې هم جوړې شي، چې د کروندګرو لپاره به د اقتصادي پیاوړتیا ترڅنګ کاري فرصتونه هم برابرې شي.