لغمان کې اړمنو کورنیو ته د سبو او مېوو د پروسس توکي ووېشل شول
۱۴ لړم ۱۴۰۳ه.ش
۲ جُمَادَى الأول ۱۴۴۶ه.ق
په لغمان کې د کرنې، اوبو لګولو او مالدارۍ ریاست د خوراک او کرنې نړیوال سازمان په مالي ملاتړ سره د قرغیو ولسوالی په سل اړمنو او بېوزله مېرمنو د سبزیجاتو او میوه جاتو د پروسېس کولو لپاره ۴۶ ډوله بېلابېل وسایل ووېشل. دا مرسته د ځان بسیاینې او کورني اقتصاد د پیاوړتیا لپاره ترسره شوه.
په مرسته کې هرې کورنۍ ته سطلونه، دیګي، لویې پلاستیکي کاسې، چاقوګان، د ګاز ډبه، د پخلي نغری، ایشټوپ، پلاستیکي څوکۍ او مېزونه او د پروسېس شوو موادو د ساتلو کوتۍ شاملې وې. دغه وسایل د کرنې د چارو امر انجینر بریالي همدرد، د قرغیو د کرنیزو چارو مدیریت کارمندانو او د خوراک او کرنې نړیوال دفتر ولایتي مسؤلینو په حضور کې اړمنو کورنیو ته ووېشل شول.
د کرنې رییس مولوي عبدالستار محمد وویل چې دغه کورنۍ به د وسایلو په کارولو سره له میوه جاتو او سبزیجاتو څخه د اچار، مربا، روب او نورو پروسېس شوو خوراکي توکو تولید وکړي. د دې تولیداتو د پلور له لارې به د یادو کورنیو اقتصاد پیاوړی او په ځان بسیا شي.
