د ننګرهار دکرنې د پراختیا په پار د نږدې لس میلیونه افغانیو په ارزښت د پروژو هوکړه لیکونه لاسلیک شول
۹ تله ۱۳۹۸
د کرنې، اوبولګولو او مالدارۍ وزارت د ننګرهار ولایت د کامې، کوز کونړ او بهسودو ولسوالیو د کرنې د پراختیا په پار ددغو ولسوالیو له ۱۱ پرمختیایي شوراګانو سره د نږدې لس میلیونه افغانیو په ارزښت د شنوخونو، سربندونو او کانالونو جوړولو هوکړه لیکونه لاسلیک کړل.
په هغه غونډه کې، چې په همدې موخه د ننګرهار ولایت دمقام د رسنیو په دفتر کې جوړه شوې وه د ننګرهار والي شاه محمود میاخېل، د ننګرهار د ولایتي شورا مرستیال عبید الله شینواري، د ولایتي شورا منشۍ حمیرا رفیع، د کرنې رییس انجنیر سمیع الله نصرت او د یادو ولسوالیو د پرمختیایي شوراګانو یوشمېر غړي کډون درلود.
په دې غونډه کې د ننګرهار والي شاه محمود میاخېل بزګرانو سره دمرستې په پار د کرنې وزارت کړنې وستایل او زیاته یې کړه، چې بزګرانو سره مرسته کول د کرنې په برخه کې ځان بساینې ته لار هواروي. هغه ددغو پروژو د پلي کېدا پر روڼتیا او کیفیت ټینګار وکړ او زیاته یې کړه، چې شوراګانې او ولسي دې په ټولو برخو کې له حکومت سره مرسته او همکاري وکړي .
د ښاغلي میاخېل په وینا د ننګرهار څلور واړه موسمونه د کرنې او مالدارۍ په برخه کې د اوبو او هوا له پلوه چمتو دی او له همدې امله هڅه کوي چې د کرنې، مالدارۍ او بڼوالۍ برخه کې ډېر کار وکړي.
په ورته وخت کې د ننګرهار د کرنې اوبولګولو او مالدارۍ رییس انجنیر سمیع الله نصرت وویل، یادې پروژې د اقلیمي بدلونونو له کبله د رامنځته کېدونکو ګواښونو د کموالي پروژې« CDRRP» له لورې پلي کیږي، چې په کې د یو میلیون او ۱۵۷ زره افغانیو په لګښت میرمنو لپاره لس شنې خونې جوړیږي، ترڅو له دې لارې د برخمن شویو مېرمنو د کورنیو عواید ډېر او اقتصادي ودې ته یې زمینه برابره شي.
د ښاغلي نصرت په خبره په یادو پروژو کې د څلور میلیونه او ۳۱۲ زره افغانیو په ارزښت اووه لوی سوداګریزې شنې خونې جوړول هم شامل دي، چې هره یوه یې ۳۰۱ متر مربع ده او د ۲۱ تنو بزګرو له لورې به ترې په موسمي حاصلاتو کې ګټه واخیستل شي. هغه زیاته کړه، چې ددغو پروژو په ډله کې د څلور میلیونه او ۴۸۷ زره افغانیو په لګښت د ۱۳کانالونو او سربندونو جوړول هم شامل دي، چې په جوړیدو سره به یې ۵۵۰ کسانو ته په مستقیم ډول ګټه ورسیږي او دوه زره جریبه ځمکې ته به په منظم ډول اوبه ورکړل شي .ددغو کانالونو رغول ددې ترڅنګ، چې د اوبو د ضایعاتو مخه نیسي د کانالونو تر پوښښ لاندې ځمکو د حاصلاتو د ډېر والي سبب هم کیږي.
باید وویل شي، چې ددغو پروژو د پلي کولو موخه د بزګرانو ملاتړ او د دوی دعوایدو زیاتولو ترڅنګ د کرکېلي معیاري او میکانیزه کول دي.
