خوست کې د اوبولګولو د پروژې او حیواني کلینیکونو څخه څارنه وشوه
١۵ لړم ۱۴۰۲ه.ش
٢۲ ربیعالثاني ۱۴۴۵ ه.ق
د خوست دکرنې، اوبولګولو او مالدارۍ ریاست د افغان پرمختيايي مؤسسې په همکارۍ ددې ولایت داسماعیل خېلو او مندوزیو ولسوالی اړوند دمقبل خيدر خېلو ویالې رغنیزې چارې پیل کړي دي، چې د خوست دکرنې ریاست له خوا ددې پروژې د چارو څارنه وشوه.
د چارواکو په خبره دغه ویاله پخوا تخريب شوې وه او بزګران يې له سختو ستونځو سره مخامخ کړي وو.
دغه راز ددرويخېلو ويالې چارې څو ورځې مخکې پیل شوي وې، چې ۳۰ متروپه اوږدوالی دوه متره په سور او ۱/۲۰ سانتي مترو په لوړوالي سره يي چارې په اساسي ډول روانې دي.
بلخوا د خوست دکرنې ریاست تخنیکي ټیم د اسماعیل خېلو ولسوالی له حیواني کلینیکونو څخه هم څارنه وکړه او اړوندو چارواکو ته لازمې سپارښتنې وکړې.
دغه راز د خوست ولایت د سپېرې ولسوالی ۳۰ مالدارانو سره په افغانستان کې د ډنمارک کمېټې په همکارۍ د مالدارۍ اړینو توکو مرسته هم وشوه.
ددغو پروژو د پلي کولو موخه د اوبو ضایعاتو مخنیوی، بزګرانو ته پر وخت اوبو برابرول او په ټوله کې د اوبو مدیریت او ترڅنګ یې د کلینیکونو د څارنې له لارې مالدارانو ته د باکیفیته درملو او دوی ته د اساسي چوپړتیاوو وړاندې کول دي.
