د پکتیا دکرنې رییس د ملګرو ملتونو پراختیايي پروګرام له چارواکو سره وکتل
۳ وږی ۱۴۰۳ه.ش
۲۰صَفَر المُظَفَّر ۱۴۴۶ه.ق
د پکتیا دکرنې، اوبولګولو او مالدارۍ رییس مولوی سید امین هاشمي په دې ولایت کې د ملګرو ملتونو پراختیايي پروګرام (يو ان ډي پي) له چارواکو سره په کتنه کې پر بېلابېلو موضوعاتو خبرې اترې وکړې.
ددې لیدنې په ترڅ کې د ملګرو ملتونو پراختیايي پروګرام (يو ان ډي پي)د دفتر مسؤل هارون هاند د خپلو فعالیتونو او راتلونکو پروژو په اړه معلومات د غونډې له ګډونوالو سره شریک کړل او همدا راز په دوه اړخېزه همکاريو د بحث ترڅنګ د ښې همغږۍ په رامنځته کولو ټينګار وشو.
ښاغلی هاند د کرنې ریاست څخه دتېرو همکاریو په دوام د پروژو د ښه او اغېزمن پلي کېدو په برخه کې د لا زیاتو همکاریو غوښتنه وکړه.
په همدې حال کې د پکتیا دکرنې رییس په خپلو خبرو کې د ياد دفتر له استازو سره د همکارۍ د ژمنې ترڅنګ د مؤسسو له مسؤلينو وغوښتل، چې خپلې چارې د کرنې رياست سره په همغږۍ په پوره شفافيت سرته ورسوي، نوموړي همداراز وويل چې د يادو پروژو په پلي کېدو سره به د کرنې او مالدارۍ په برخه سهولتونه هم رامنځته کړي.
