ننګرهار کې په ۱۰۰ بېوزله او کونډو مېرمنو وزې ووېشل شول
د ننګرهار دکرنې، اوبولګولو او مالدارۍ ریاست د خوړو نړیوال پروګرام «WFP» په مالي او د افغانستان راتلونکې نسلونو «FGA» په تخنیکي همکارۍ ددې ولایت پر ۱۰۰ کونډو او بېوزله ښځو ۲۰۰ وزې او د څارویو خوراکي توکي وېشلي دي.
د ننګرهار دکرنې، اوبولګولو او مالدارۍ ریاست مرستیال قاري فضل الرحمن صادق وویل، چې ددې ولایت پر ۱۰۰ بېوزله او کنډو مېرمنو پر هرې مېرمنې دوه وزې او ترڅنګ یې ۵۰ کیلو ګرامه د څارویو خوراکي توکي وېشل شوي دي، چې ټولیز لګښت یې پنځه میلیونه او ۴۰۰ زره افغانۍ ده.
ښاغلی صادق وویل، چې د ننګرهار دکرنې ریاست هلې ځلې کوي، چې د همکارو مؤسسو په مرسته داسې نورې مرستې راجلب کړي او د لغمان ولایت بېوزله او اړمنو وګړو ته ورسوي.
ددې مرستې موخه د مالدارۍ سکټور پراختیا او په ټوله کې د بېوزله مېرمنو اقتصادي پیاوړتیا ده.
