د ا.ا.ا. یو شمېر لوړپوړو چارواکو د قوش تېپې کانال له چارو لیدنه وکړه
۱۷ کب ۱۴۰۱ه.ش
۱۵ شَعبان المُعَظّم ۱۴۴۴ ه.ق
د ریاستالوزراء اقتصادي مرستیال ملا عبدالغني برادر اخوند په مشرۍ د ا.ا.ا. یو شمېر لوړپوړو چارواکو د قوشتېپې کانال څخه د لیدنې په موخه بلخ ولایت ته سفر وکړ. د یاد کانال څخه د لیدنې پر مهال د ریاستالوزراء د اقتصادي مرستیال تر څنګ، د ریاست الوزراء اداري مرستیال مولوي عبدالسلام حنفي، د مخابراتو او معلوماتي ټکنالوژۍ وزیر مولوي نجیب الله حقاني، د کرنې، اوبو لګولو او مالدارۍ وزارت مسلکي مرستیال مولوي صدر اعظم، د کورنیو چارو وزارت مرستیال محمد ابراهیم صدر، د روغتیا وزارت مرستیال مولوي محمد اسحق، د افغانستان بانک مرستیال نور احمد آغا، د ننګرهار والي حاجي ګل محمد، د بلخ والي مزمل، د سمنګان والي حاجي فضلي، د بلخ د قول اردو مسئول مولوي مطیع الله او نورو لوړ پوړو دولتي چارواکو هم ګډون کړی و.
د ریاست الوزراء اقتصادي مرستیال ملا عبدالغني برادر اخوند د یاد کانال څخه د لیدنې پر مهال وویل: «زموږ د نني سفر موخه د قوشتېپې کانال له کاري پرمختګونو څخه لیدنه ده، چې الحمدالله کارونه یې د ملي پراختیا شرکت په رهبرۍ او سالم مدیریت له امله د پلان سره سم پر مخ روان دي.»
د ریاست الوزراء اقتصادي مرستیال ملا عبدالغني برادر اخوند زیاته کړه: «د افغانستان اسلامي امارت د قوشتېپې کانال پلي کېدو ته ژمن دی او زموږ د نني راتګ له موخو څخه یوه هم دا وه تر څو خپل ملت ته ډاډ ورکړو چې موږ د دې ملي او حیاتي پروژې بشپړېدو او په هر صورت پای ته رسولو ته ژمن یو.»
ددې لیدنې په ترڅ کې د ریاست الوزراء اقتصادي مرستیال ملا عبدالغني برادر اخوند او نورو چارواکو د یادې پروژې د مسؤلینو له ترسره شوو هڅو ستاینه وکړه او هغوی ته یې د کارونو د لا ښهوالي په موخه لازمې سپارښتنې وکړې.
د قوش تېپې کانال پروژه د هېواد شمال کې له امو سيند سره تر يو ځايه موازي پراته ده. د قوش تېپې کانال دا ظرفيت لري چې د يو کال په موده کې له امو سينده ۱۰ مېليارده متر مکعب اوبه پورته او ځمکې پرې خړوبې شي.
دکرنې وزارت د چارواکو په خبره دغه پروژه د ۲۸۰ کیلومتره په اوږدوالي، د ۱۰۰ متره په پلنوالي او ٨،٥ مترو په ژوروالي سره په بلخ، جوزجان او فاریاب ولایتونو کې د شاوخوا ۵۰۰ زره هکټاره ځمکې د خړوبولو وړتيا لري. د دې پروژې له بشپړېدو سره به پر نورو هېوادونو د افغانستان د غلې دانې تکیه راکمه شي. افغانستان اوسمهال د اړتیا وړ ډېره برخه غنم د منځنۍ اسیا له هېوادونو او پاکستانه واردوي.
د يادوني وړ ده، چي د قوش تېپې کانال د هيواد په تاریخ کي له سترو او ملي پروژو څخه ده، چي په بشپړېدو سره به یې د هيواد په شمال کي شاوخوا درې نیم میلیونه جریبه شاړه او بې حاصله مځکه خړوبه شي.
