د زابل دکرنې رياست:سېلاب ځپلو سره دې بېړنۍ او اړينې مرستې ووشي

۱۰ زمری ۱۴۰۱ه‍.ش
۳ محرم الحرام ۱۴۴۴ ه‍.ق
د زابل دکرنې، اوبولګولو او مالدارۍ رياست وايي، چې د ياد رياست په سکټوري غونډه کې د زابل دکرنې رييس مولوی عطاالله راشد له کورنيو او نړيوالو خيريه بنسټونو و غوښتل، چې ددې ولايت له سېلاب ځپلو کورنيو سره دې بېړنۍ او اړينې مرستې وکړي.
ښاغلی راشد وويل، چې د وروستي سېلابونو له امله د لومړنیو معلوماتو له مخې  ۲۰۰۰ جریبه کرنيزې ځمکې او بڼونه تخریب شوي دي او د تېرې ورځې سېلابونو د ځاني تلفاتو ترڅنګ د ولایت په کچه لسګونه کورونه او هټۍ هم ویجاړ کړي او په زیاته کچه یې کرنیز حاصیلات  له منځه وړي دي.
د زابل دکرنې رييس عطاالله راشد د سېلاب ځپلو لپاره  دلومړنيو او خوراکي توکو د مرستې غوښتنه وکړله او  له کورنيو او نړيوالو خيريه بنسټونو و غوښتل، چې ددې ولايت له سېلاب ځپلو کورنيو سره دې بېړنۍ او اړينې مرستې وکړي.
په همدې حال کې په دې غونډه کې د مرستندويو مؤسسو چارواکو د زابل دکرنې رياست ته د هر اړخيزو همکاريو ډاډ ورکړل.