پکتیکا ته د کرنې وزارت د مسلکي مرستیال سفر
۲۶ چنګاښ ۱۴۰۱ ه.ش
۱۸ ذوالحجَّة ۱۴۴۳ ه.ق
دکرنې، اوبولګولو او مالدارۍ وزارت د کرنې او مالدارۍ مرستیال مولوی صدراعظم پکتیکا ولایت ته د خپل سفر په ترڅ کې ددې ولایت دکرنې رییس مولوی محمد اسماعیل شکیب او کارکوونکو وسره وکتل.
ددې کتنې په ترڅ کې د پکتیکا دکرنې رییس مولوی محمد اسماعیل شکیب دیاد ولایت د امارتي ځمکو، د بزګرانو، مالدارانو او دکرنې او مالدارۍ سکټور اړونده ستونزې د کرنې وزارت مسلکي مرستیال سره شریک کړل.
په همدې حال کې دکرنې وزارت دکرنې او مالدارۍ مرستیال مولوی صدراعظم د یاد ولایت دکرنې او مالدارۍ په سکټور کې د شته ستونزو د هوارولو د ژمنې ترڅنګ وویل، چې د پلان مطابق به سږکال د پکتیکا په ولایت کې ډېرې برنامې پلي شي. مولوی صدراعظم وویل: «د بزګرانو او مالدارانو ستونزو او دکرنې ریاست وړاندیزونو ته په کتو به ګټورې پروژې پلي شي.»
دکرنې وزارت مسلکي مرستیال دپکتیکا ولایت د کرنې او مالدارۍ سکټور د ستونزو د اروزنې او هوارولو په پار یاد ولایت ته سفر کړی دی.
