هلمند کې د ولایت په کچه د وړیو تولید او راټولونې ټولنه جوړه شوه

۲۱ کب ۱۳۹۹
دهلمند ولایت دکرنې، اوبولګولو او مالدارۍ ریاست اړوند د مالدارۍ او حیواني روغتیا امریت لخوا، د کوچي مالدارانو لپاره د وړیو د تولید او راټولونې ټولنه جوړه شوه.
د هلمند دکرنې رييس زلمی الکو واييدا چې دهلمند ولایت ډېره مالداري او تر څنګ یې په زیاته کچه حیواني تولیدات لري، چې له دې ډلې  یو هم وړۍ دي، ددی لپاره چې د وړیو لپاره ښه بازار رامنځ ته او د مالدارانو اقتصادي ودې ته زمينه برابره شي ياده ټولنه جوړه شوه.
 د ښاغلي الکو په خبره د يادې ټولنې جوړولو په پار د کوچي مالدارانو ترمنځ په ازاد ډول ټاکنې ترسره شوې، چې په پایله کې یې د ټولنې رييس حاجي کجیر خان، مرستیال حاجي کرم خان، منشي حاجي فضل الدین،  خزاندار ګلبدین خان او ویاند محمد نبي خان  وټاکل شول.
غونډې ته دهلمند ولایت د کوچیانو او مالدارانو په استازیتوب له ټولو ولسوالیو څخه ۱۰-۱۰ کسان راغوښتل شوي وو چې، په ټوليزه توګه  ٢٥٠ تنو مالدارانو حضور درلود.
ياده ټولنه د کوچيانو او مالدارانو د نورو ستونزو د هوارولو سربېره د دوی وړيو پلور ته زمينه برابروي.