ارزګان کې د چرګانو روزنې کاروبار په غوړېدو دی
۱۲ سلواغه ۱۳۹۹
د ارزګان په ولایت کې د چرګانو روزنې فارمونو وده کړې او په دې وروستیو کلونو کې په دغه ولایت کې دچرګانو ۴۵ فارمونه جوړ شوي، چې له دې ډلي ۱۵ فارمونه یې نوي جوړې شوي، چې د کال سلګونه ټنه غوښه تولیدوي.
د چرګانو روزنې دغه شمېر فارمونه د ارزګان ولایت په بېلابېلو څنډو کې د کرنې، اوبولګولو او مالدارۍ وزارت او خصوصي سکټور په ګډې همکارۍ جوړې شوي دي.
د ارزګان ولایت کرنې، اوبولګولو او مالدارۍ ریاست چارواکي وایي، چې د چرګانو فارمونو د ودې او پراختیا په پار یې هڅې چټکې کړي دي.
باید وویل شی، چې د کرنې وزارت په دې ولایت کې د چرګانو روزنې د پراختیا په پار ګڼې برنامې پلي کړي، چې په دغو برنامو کې د چرګانو روزنې فارمونه جوړول، د چرګانو فارم لرونکو ته روزنیزې برنامې په لاره اچول، پر چرګانو روزونکو د چرګانو روزنې اړونده توکي وېشل او دوی ته اسانتیاوې برابرول شامل دي.
