پکتیا کې د نیالګیو کېنولو ملي ورځ ولمانځل شوه
۲۰ کب ۱۳۹۸
د هېواد د یوشمېر نورو ولایتونو په شان په پکتیا کې هم د کب شلمه د نیالګیو کېنولو ملي ورځ د نیالکیو په کېنول او د کمپاین په پیل سره ولمانځل شوه.
دغه کمپاین نن د پکتیا ولایت مرستیال والي عبدالولي سهي، د پکتیا د کرنې، اوبولګولو او مالدارۍ رییس انجنیر محمد الدین مومند، سیمه ییزو چارواکو، د مدني ټولنو غړو، قومي مشرانو، بزګرانو او د پکتیا د یوشمېر اوسیدونکو په شتون کې پیل شو.
په هغه غونډه کې، چې په همدې موخه جوړه شوې وه د پکتیا د کرنې، اوبولګولو او مالدارۍ رییس محمدالدین مومند وویل، چې ددې کمپاین په ترڅ کې به په پکتیا کې ۲۲۱ زره مېوه لرونکي، بې مېوې او زینتي نیالګي کېنول شي او ددې ترڅنګ یې سږ کال په پکتیا ولایت کې اته میلیونه د سپیدار قملې هم کېنول کیږي.
ښاغلي مومند همداراز وویل، چې د پکتیا ولایت د ځنګلونو د بیارغونې په پار د جلغوزیو او چهارمغزو ۳۶۰ کورني قوریې هم جوړې شوي دي، چې ورسره به ددې ولایت دوه زره او ۷۰۰ تخریب شوي ځنګلونه بیا رغول شوي دي.
په همدې حال کې دپکتیا مرستیال والي د کرنې ریاست له کړنو او فعالیتونو څخه د مننې ترڅنګ په خپلوخبرو کې ددې ولایت له اوسیدونکو څخه غوښتنه وکړه، چې په خپلو ځمکو او کورونو کې دې مېوه لرونکي او بې مېوې نیالګي وکري او ددې ولایت په سمسورتیا کې دې ونډه واخلي.
