د ننګرهار وادي کرنیز شرکت: د هډې فارم مالدارۍ څانګه هره ورځ شاوخوا ۶۰۰ لیټره شیدې تولیدوي
۹ وږی ۱۴۰۵ هـ.ش
۱۷ رَبِیعُ الْأَوَّل ۱۴۴۸ هـ.ق
د ننګرهار وادي کرنیز امارتي شرکت اړوند د هډې فارم په مالدارۍ فارم کې له ۳۰۶ غواګانو څخه ۶۳ یې شیدې ورکوي، چې هره ورځ ترې شاوخوا ۶۰۰ لیټره شیدې ترلاسه کېږي.
د یاد شرکت د کرنیزو او تخنیکي چارو ریاست اړوند د مالدارۍ فارم عمومي امر، انجنیر شکرالله نورزي، وايي چې په فارم کې د غواګانو د سالمې ساتنې، مناسبې تغذیې او روغتیا لپاره لازم تدابیر نیول شوي دي.
نوموړی زیاتوي، د اوړي د موسم د لوړې تودوخې د اغېزو د کمولو او د څارویو د هوساینې په موخه په فارم کې د موجودو غواګانو لپاره د اوبو فوارې هم نصب شوې دي.
د معلوماتو له مخې، د هډې فارم مالدارۍ فارم د هډې فارم په ۱۹.۵ جریبه ځمکه کې جوړ شوی او چارې یې د ۲۵ تنو کارکوونکو له لوري پر مخ وړل کېږي.
همداراز، په یاد فارم کې د څارویو د روغتیا د ساتنې لپاره مجهز درملتون او مسلکي وټرنران شتون لري، چې د څارویو روغتیايي وضعیت څاري او د اړتیا پر مهال ورته لازمې درملنې او روغتیايي خدمتونه وړاندې کوي.
د هډې فارم مالدارۍ فارم د غواګانو د ساتنې او شېدو د تولید ترڅنګ، د مالدارۍ د پراختیا، د څارویو د سالمې روزنې او د لبنیاتو د تولید په برخه کې د ننګرهار وادي کرنیز امارتي شرکت له مهمو فعالیتونو څخه بلل کېږي.
