د فراه ولایت د کرنې پوهنځی زده کړیالانو د بولان څېړنیز فارم او انار باغ قوریه کې عملي زده کړې ترلاسه کړل
۲۴ غویی ۱۴۰۵ه.ش
۲۷ ذُو ٱلْقَعْدَةِ ۱۴۴۷ه.ق
د هلمند ولایت د کرنې، اوبولګولو او مالدارۍ ریاست اړوند د بولان څېړنیز فارم او د نیالګیو روزنځای څخه د فراه ولایت د کرنې پوهنځی زده کړیالانو د عملي زده کړو په موخه لیدنه وکړه.
د یادې لیدنې پر مهال محصلینو ته د فارم د بېلابېلو نباتاتو د څېړنیزو او تولیدي قطعاتو په اړه هر اړخیز معلومات وړاندې شول، چې پکې د تجربو د ثبت، د مختلفو زراعتي معلوماتو ثبت او د څېړنیزو چارو اړوند عملي زده کړې شاملې وې.
همدارنګه محصلینو ته د مورني تخمونو د ځمکو د آماده کولو، مناسبې فاصلې، د تخمونو د اصلاح شوو صنفونو، خیشاوې، لو، تریشر، پروسس او بسته بندئ په برخو کې لازم تخنیکي معلومات او عملي پوهاوی ورکړل شو.
ورسره د بولان د نیالګیو روزنځای کې هم د نیالګیو د روزنې د بېلابېلو مرحلو، د تخم کرنې، پالنې، انتقال او ساتنې په هکله محصلینو ته عملي معلومات وړاندې او لازمې لارښوونې ورسره شریکې شوې.
د یادې علمي او عملي لیدنې موخه د زده کړیالانو د مسلکي ظرفیت لوړول، د څېړنیزو فعالیتونو سره بلدتیا او د کرنیزو علومو عملي تجربو ته وده ورکول و.
