د کندهار دکرنې ریاست؛ د ارغستان سردرې چکډېم د اوبو زیرمې پیاوړې کړې او د خلکو ستونزې یې راکمې کړې
۱۳ وری ۱۴۰۵ه.ش
۱۵ شَوّالُ المُکَرَّم ۱۴۴۷ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د قدرتي سرچینو آمریت انجنیرانو او د کرنې وزارت مسلکي پلاوي د ارغستان ولسوالی د سردرې سیمې ته د سفر په ترڅ کې او د یاد چکډېم څخه یې نږدې لیدنه او څارنه وکړه.
د کندهار د قدرتي سرچینو آمریت انجنیر نورمحمد همکار وایي، چې د سردرې چکډېم په ۱۴۰۴ کال کې ګټې اخیستنې ته سپارل شوې وه او اوس یي د ودانیزو چارو د کیفیت د ارزونې او تضمین په موخه دا څارنیز سفر ترسره شو.
نوموړي زیاته کړه، چې یاد چکډېم په لوړ کیفیت او معیاري ډول جوړ شوی او د سیمې پر اوبو یې مثبت اغېز کړی دی. د دې چکډېم جوړېدو سره سم نږدې کاریزونه او د ځمکې لاندې د اوبو زیرمې پیاوړې شوي دي.
بل لور بیا د سیمې اوسېدونکي هم د دې چکډېم جوړیدو څخه خوښ دي او وایي، چې د چکډېم په جوړېدو سره د اوبو کمښت تر ډېره حل شوی او د کرنیزو فعالیتونو لپاره مناسب شرایط برابر شوي دي.
د یادونې وړ ده، چې د ارغستان ولسوالی د سردرې چکډېم د ۱۴۰۴ کال په اوږدو کې د ۳.۴ میلیونه افغانیو په لګښت، د کرنې وزارت د پراختیایي بودجې له لارې جوړه شوې وه.
