د خوست تڼیو ولسوالی کې د سرو املوکو د ۵۰ بڼونو د جوړولو لپاره هر اړخیزه سروې ترسره شوه

۱۸ مرغومې ۱۴۰۴ه‍.ش
۱۸ رَجَب المُرَجَّب ۱۴۴۷ه‍.ق
د خوست ولایت د کرنې، اوبو لګولو او مالدارۍ ریاست اړوند د تڼیو ولسوالی د کرنیزو چارو عمومي مدیریت کارکوونکو، د «ویرو» مؤسسې په همکارۍ، د تڼیو ولسوالی په اتو بېلابېلو کلیو کې د سرو املوکو د ۵۰ بڼونو د جوړولو په موخه هر اړخیزه سروې ترسره کړه، څو د بڼوالۍ د پراختیا لپاره مناسبې سیمې وپېژندل شي.
یاده سروې د دې لپاره ترسره شوه، تر څو د سیمې اقلیمي شرایط، د خاورې ډول، د اوبو موجودیت او د بزګرانو لېوالتیا وڅېړل شي او د سرو املوکو د بڼونو د جوړولو لپاره مناسبې ځمکې تثبیت او تشخیص شي. د سروې پر مهال له بزګرانو سره نږدې مشورې وشوې او هغوی ته د باغدارۍ د ارزښت، اقتصادي ګټو او د سرو املوکو د تولیدي اهمیت په اړه لازم معلومات ورکړل شول.
د مسؤلینو په وینا، د دې سروې پایلې به د سرو املوکو د بڼونو د معیاري او منظم جوړولو، د کرنیزو تولیداتو د زیاتوالي، د بزګرانو د عوایدو د لوړوالي او په سیمه کې د بڼوالۍ د ودې لپاره اغېزمن رول ولوبوي.
د خوست ولایت د کرنې، اوبو لګولو او مالدارۍ ریاست ټینګار کوي، چې د بزګرانو ملاتړ ته به دوام ورکړي او د پایدارې کرنې او بڼوالۍ د پراختیا لپاره به عملي ګامونه پورته کوي، تر څو بزګران وکولای شي له نوې ټکنالوژۍ او معیاري بڼوالۍ څخه ښه اقتصادي ګټه پورته کړي.