ننګرهار کې ۳۰۰ د اصیلو ګلابو بڼوالو ته د بڼوالۍ توکي ووېشل شول

۱۴ مرغومې ۱۴۰۴ه‍.ش
۱۴ رَجَب المُرَجَّب ۱۴۴۷ه‍.ق
د ننګرهار د کرنې، اوبو لګولو او مالدارۍ ریاست په هڅو، د ډاکار خیریه مؤسسې په تخنیکي او له جرمونو او مخدره توکو سره د ملګرو ملتونو د مبارزې دفتر (یو.ان.او.ډې.سي) په  ۱۰ میلیونه او ۵۰۰ زره افغانیو مالي ملاتړ، ۳۰۰ د اصیلو ګلابو بڼوالو ته د بڼوالۍ اړوند وسایل ووېشل شول، څو د ګلابو د بڼونو د کرلو، ساتنې او د حاصلاتو د زیاتوالي زمینه برابره شي.
یاده مرسته هغو ۳۰۰ بڼوالو ته ووېشل شوه، چې له ډلې یې ۱۵۰ تنه نوي او ۱۵۰ تنه پخواني بڼوال دي. د پروژې موخه د اصیلو ګلابو د بڼونو کرل، سمې روزنې ته وده ورکول، د افتونو او ناروغیو کنټرول او د لوړو حاصلاتو ترلاسه کول دي.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې هر بڼوال ته د ښاخبرۍ وړې او غټې قیچیانې، آره، د حاصل ټولولو بېک او جامې، دستکشې، برقي تله، پنجې، تسکوره، رمبې، بېلچه، لاسي څراغ، لاسي کراچی، پلاستيکي پمپونه او پلاستیک ووېشل شول.
نوموړي زیاته کړه، د یادو وسایلو د وېش موخه د اصیلو ګلابو ترویج، د بڼوالۍ پیاوړتیا او خلکو ته د کار موندنې د زمینې برابرول دي.
همدارنګه د پروژې ساحوي مسؤل انجنیر احسان‌الله عزیزی وویل، چې یادو بڼوالو ته د ګلابو د کرلو، د ناروغیو د مخنیوي او ښه مدیریت، اوبخور، د هرزه واښو کنټرول، د حاصلاتو راټولولو او نورو کرنیزو عملي چارو په اړه روزنې ورکړل شوې دي. نوموړي همدارنګه د وسایلو د سم استعمال او اغېزمنې استفادې په اړه بڼوالو ته لازمې لارښوونې او سپارښتنې وکړې.