بولدک فرضي کرښې له لاري پاکستان ته د زرګونه پسونو د قاچاق مخه نیول شوې

۱ مرغومې ۱۴۰۴ه‍.ش
۱ رَجَب المُرَجَّب ۱۴۴۷ه‍.ق
د کندهار د کرنې، اوبو لګولو او مالدارۍ ریاست اړوند، د مالدارۍ آمریت چارواکي وایي، چې د سپین بولدک ولسوالی د کرنې او مالدارۍ مسؤلینو او امنیتي ارګانونو د ویښو او بیدارو مجاهدینو په ګډه همکارۍ، په تېرو درېیو میاشتو کې پاکستان ته د ۵ زره او ۱۹۸ پسونو د قاچاق مخه نیول شوې ده.
د سپین بولدک ولسوالی مسؤلین زیاتوي، چې یو شمېر کسانو هڅه کوله یاد شمېر پسونه د سپین بولدک ولسوالی د فرضي کرښې له لاري په غیرقانوني او قاچاقي ډول پاکستان ته انتقال کړي، چې پرمهال یې د مالدارۍ او امنیتي مسؤلینو پر وخت اقدام وکړ او د قاچاق مخه یې ونیول. د دې قاچاق په تړاو لسګونه کسان هم نیول شوي، چې د نورو څېړنو لپاره اړوندو ارګانونو ته سپارل شوي دي.
د یادونې وړ ده، چې په دې وروستیو کې د قاچاقي څارویو د مخنیوي په موخه د کندهار د کرنې ریاست، امنیه قوماندانۍ او اړوندو امنیتي مسؤلینو ګډې هڅې زیاتې شوي دي. چې د همدې هڅو په دوام، تر دې وړاندې هم د ۲۴۰۰ پسونو د قاچاق مخه نیول شوې وه، او مسؤلین وایي چې په راتلونکي کې به د څارویو د قاچاق پر وړاندې دا ډول کمپاینونه لا هم پیاوړي کړي