دهلمند ولایت شمالي ولسوالیو کې ویالو سروې او د قدرتي سرچینو د تثبیت چارې روانې دي

۱۴ لړم ۱۴۰۴ هـ.ش
۱۴ جُمَادَى الأول ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست، د قدرتي سرچینو آمریت فني کارکوونکو د شمالي ولسوالیو د زابرانو، ځنګلونو او څړځایونو د هراړخیزې سروې لړۍ په دوام، د ګرشك ولسوالی د ده ادم خان د ۲۵ کیلومترو په اوږدوالي ویالې د پاک کارۍ په موخه د دوو ورځو په جریان کې د سروې لړۍ بشپړه کړه.
یاده ویاله چې له بدوان کلي څخه پیل او د حاجي سیدمحمد، تورجان، کاکړانو، فقیرانو، حاجي تورجان، حاجي آغا کلیو او نورو سیمو پورې غځېدلې او ټول ټال ۴۵ کلي پکې شامل دي، په پای کې د آب پاشک پر کلي ختمېږي او شاوخوا ۱۵ زره جریبه کرنیزه ځمکه خړوبه کوي. دغه ویاله د سیمې کرنیزو مځکو لپاره حیاتي ارزښت لري، چې دا مهال یې ډېری برخې د اوبو د کمښت له ستونزې سره مخ دي.
همدارنګه د یاد سفر پر مهال د سیمې زابرونه هم وڅېړل شول، څو د هغو د ګټورتیا او د مځکو د ساتنې په برخه کې د هغوی رول و ارزول شي.
د هلمن دکرنې ریاست د قدرتي سرچینو آمریت مسؤلین وایي، چې د دغو چارو موخه د اوبو د اغېزمن مدیریت، د کرنیزو مځکو غوره خړوبول او د شمالي ولسوالیو د قدرتي سرچینو د ساتنې او منظم مدیریت پیاوړتیا ده.