لغمان کې د جلغوزې او غوزانو د ځنګلونو د بیا احیا لپاره هڅې کړندي شوي

۴ مرغومی ۱۳۹۸
د لغمان د کرنې، اوبولګولو او مالدارۍ ریاست وایي، چې دوی په دې ولایت کې د جلغوزې او غوزانو «چهارمغزو» د ځنګلونو د بیا احیا لپاره هڅې کړندي کړې دي.

د یاد ریاست چارواکي وایي، چې ددې ولایت د جلغوزې او چهارمغزو د ځنګلونو د بیا رغونې لپاره ددې ولایت په علیشنګ او دولت شاه ولسوالیو کې د چهارمغزو او جلغوزې د ۳۷ کورنیو قوریو د جوړولو په پار پر بزګرانو د کورنیو قوریو دجوړولو اړونده توکي وېشلي دي. د دوی په خبره د توکو د وېش ترڅنګ برخمن شویو کورنیو ته د کورنیو قوریو د جوړولو په برخه کې اړینې روزنې هم ورکړل شوي دي. په روزنیز پروګرام کې قوریه لرونکو ته د ځنګلونو پر اهمیت، ساتنه او پالنه او دغه راز په قوریو کې د نیالګیو د تولید په پرخه کې عملي او نظري روزنه ورکړل شوې ده. د لغمان د کرنې ریاست چارواکي وایي، چې په یادو ولسوالیو کې نږدې ۹۲ زره او ۵۰۰ خریطې دګې شوي او د جلغوزې تخمونه هم په کې کرل شوي دي، چې وروسته بیا ددې ولایت د جلغوزې او چهارمغزو ځنګلونو د بیا رغونې په پار به له همدغو قوریو څخه ګټه پورته شي.

لغمان د افغانستان د ځنګلونو له برخمنو ولايتونو څخه دی، چې د دغو ځنګلونو یوه برخه له منځه تللې، خو اوس د لغمان د کرنې ریاست د جلغوزې او چهارمغزو ځنګلونو د بيا رغونې په هڅه کې دی.