د کندهار سپین بولدک کې د ګمرک جوړولو لپاره څه باندې زر جریبه ځمکه رسماً د ګمرک ریاست ته وسپارل شوه
۳۰ زمری ۱۴۰۴ هـ.ش
۲۷ صَفَر المُظَفَّر ۱۴۴۷ هـ.ق
د اسلامي امارت د زعیم، عالیقدر امیرالمؤمنین شیخ صاحب حفظه الله تعالی ورعاه د حکم پر اساس او د کندهار د کرنې، اوبولګولو او مالدارۍ ریاست په تخنیکي همکارۍ، د سپین بولدک ولسوالۍ د حوت غره لویدیځ لوري ته ۱ زر او ۴ جریبه ځمکه د ګمرک ریاست ته انتقال او په رسمي ډول وسپارل شوه، څو د ګمرک د جوړولو او عامه خدماتو د ترسره کولو لپاره ترې استفاده وشي.
د کندهار دکرنې ریاست د کدستر آمریت د ځمکې د انتقال مدیر عصمت الله وایي، یاد انتقال د عالیقدر امیرالمؤمنین د حکم، د کرنې، اوبولګولو او مالدارۍ وزارت او د اراضي ریاست د منظور شوي مکتوب له مخې ترسره شو. د کندهار د کرنې ریاست اړوند د کدستر آمریت فني او مسلکي ټیم دغه ځمکه د اړونده مسؤلینو په شتون کې په رسمي ډول د ګمرک ریاست ته وسپارله.
د یادونې وړ ده، چې دوه ورځې وړاندې هم د عالیقدر امیرالمؤمنین شیخ صاحب حفظه الله تعالی ورعاه د ځانګړي حکم له مخې د کندهار عینومیني ښارګوټي ختیځې سیمې کې دوه زره جریبه ځمکه د ارشاد، حج او اوقافو ریاست لپاره انتقال شوې وه، چې د مرکز د حکم بشپړېدو وروسته به رسماً د یاد ریاست واک ته وسپارل شي او د کندهار ښار لپاره به د هدیرې په موخه وکارول شي.
