د هلمند دکرنې ریاست؛ د ځنګلونو د پرېکولو په تور یو تن په دیشو ولسوالی کې ونیول شو

۱۶ زمری ۱۴۰۴ هـ.ش
۱۳ صَفَر المُظَفَّر ۱۴۴۷ هـ.ق
د هلمند په ولایت کې د طبیعي سرچینو او ځنګلونو د خونديتوب په موخه د ځنګلونو د پرېکېدو د بندیز له نافذېدو وروسته، د کرنې، اوبولګولو او مالدارۍ ریاست د لارښوونې پر بنسټ د طبیعي سرچینو او ځنګلونو څارنه او ارزونه دوام لري.
د همدې لړۍ په دوام، د هلمند ولایت د کرنې، اوبولګولو او مالدارۍ ریاست د طبیعي سرچینو امریت اړوند دیشو ولسوالی د ځنګلاتو مدیر له لوري، د یادي ولسوالی په بېلابېلو سیمو کې د طبیعي سرچینو د ساتنې او نظارت لړۍ ترسره شوه.
په دې ترڅ کې د لندي په سیمه کې یوتن غاصب هغه مهال ونیول شو، چې د طبیعي ځنګلونو ونې یې په ناقانونه ډول اره کړې وې. نیول شوي کس د قانوني اجراآتو لپاره عدلي او قضايي ارګانونو ته وسپارل شو.
د هلمند د کرنې ریاست چارواکي وايي، چې د طبیعي شتمنیو ساتنه یې لومړیتوب دی، او د هر ډول ناقانونه قطع، غصب او تخریب پر وړاندې به قاطع اقدامات کوي.