کندهار کې د ۷ ټنه بي کیفیته تورې کیمیاوي سرې د پلور مخه ونیول شوه
۱۴ زمری ۱۴۰۴ هـ.ش
۱۱ صَفَر المُظَفَّر ۱۴۴۷ هـ.ق
د کندهار د کرنې، اوبو لګولو او مالدارۍ ریاست د کرنیزو چارو آمریت د معلوماتو له مخې په کندهار کې د ۷ ټنه بي کیفیته تورې کیمیاوي (ډي.ای. پي) سرې د پلورولو مخه ونیول شوه، چې د کرنې وزارت د لابراتواري معلوماتو او څېړنو وروسته یې پر پلورولو بندیز لګول شوی دی.
د کرنیزو چارو آمریت مسؤلین وايي، یاده بي کیفیته کیمیاوي سره یو تن غوښتل په بازار کې وپلوري چې پر وخت سره مسؤلینو اقدام وکړ او د پلورولو مخه یې ونیوله، او اجازه یې ور نه کړه چې یاده بي کیفیته سره بازار ته وړاندې کړي.
د یادونې وړ ده، چې د کندهار د کرنې ریاست هېڅ کرنیز شرکت ته اجازه نه ورکوي، چې بې‌کیفیته، خرابې او یا هم غیري قانوني سرې او درمل هېواد ته وارد یا وپلوري. د همدې هڅو په دوام، تېره ورځ هم په کندهار کې د ۳.۷ ټنه پوتاشیم کاربونیټ سرې د پلور مخه نیول شوې وه.
