د کرنې وزارت مرستیال د اراضۍ کارکوونکو ته: مراجعینو سره ښه چلند او چارې په اخلاص ترسره کړئ

د کرنې، اوبولګولو او مالدارۍ وزارت د اراضۍ لوی ریاست کې د ۲۳ ولایتونو د ځمکو د آمرينو او عمومي مديرانو لپاره څلور ورځنی روزنيز ورکشاپ په لاره اچول شوی دی. دغه علمي او دیني پروګرام د قرآن کریم د ختم سره مل وو، چې د معنوي فضا ترڅنګ یې ګډونوالو ته د مسلکي پوهې پراخولو زمینه هم برابره کړه.
د یاد پروګرام په وروستي ورځ د کرنې، اوبولګولو او مالدارۍ وزارت مالي او اداري مرستیال ملا آغاجان اخند "حاجي سالم"، د اراضۍ لوی رییس مولوي محمود مظلوم، او د یاد ریلست یو شمېر مشران، آمرین او ولايتي کارکوونکي ګډون کړی وو.
په پيل کې د کرنې، اوبولګولو او مالدارۍ وزارت مالي او اداري مرستیال ملا آغاجان اخند "حاجي سالم"، د قرآن عظیم الشان له مبارک آیت سره چې وايي: "يو له بل سره نېکي وکړئ او پر يو بل ظلم مه کوئ"، خپله وینا پیل کړه. نوموړي له ګډونوالو وغوښتل، چې له مراجعينو سره ښه چلند وکړي، د فساد څخه ډډه وکړي او خپل مسووليتونه په صداقت او اخلاص سره تر سره کړي. هغه زیاته کړه، چې د اسلامي امارت له راتګ سره د زورواکو له خوا غصب شوې ګڼ شمېر دولتي ځمکې بېرته استرداد شوې دي، او د اراضۍ لوی ریاست د کارکوونکو صادقانه هڅو ته اړتیا ده ترڅو دغه بهیر لا چټک او منظم شي.
په همدې حال کې د اراضۍ لوی رییس مولوي محمود مظلوم هم ګډونوالو ته خبرې وکړې او ویې ویل: "کومې ځمکې چې بېرته استردادېږي، باید لومړی د اراضۍ لوی ریاست د ځمکو په بانک کې ثبت شي، او بیا تر تائید وروسته مستحقینو ته د اجارې په ډول له یو نه تر درېیو کلونو پورې ورکړل شي." هغه ټینګار وکړ چې ټول کارمندان باید د شفافیت، صداقت، او قانون‌مندۍ له اصولو سره سم خپل کارونه تر سره کړي.
دغه ورکشاپ چې څلور ورځې یې دوام وکړ، د عملي زده‌کړو ترڅنګ د معنوي پیاوړتیا لپاره د قرآن کریم  ختم هم په کې شامل وو.
پروګرام د دعا او سپېڅلي قرآن ختم سره پای ته ورسېد او ګډونوالو د خپلو مسؤلیتونو د لا ښه تر سره کولو ژمنه وکړه.